U Shënua Dita Ndërkombëtare e Biodiversitetit me aksionin për pastrimin e lumit "Krivareka" në Kamenicë

 Kamenicë 22.05.2021

 Sot në kuadër të Ditës Ndërkombëtare të Biodiversitetit, është ogranizuar aksioni për pastrimin e lumit “Krivareka” në Kamenicë, e mbështetur edhe nga Ambasada e Shteteve të Bashkuara të Amerikës në Kosovë, Ëildlife Photogrphers, shoqëria civile, organizata të ndryshme, nxënës, KFOR-i, Policia e Kosovës e vullnetarë të shumtë.

 Në këtë aktivitet ishte i pranishëm edhe shkëlqësia e tij, ushtruesi i detyrës së Ambasadorit amerikan z. Nicholas J. Giacobbe, i cili bashkë me kryetarin Qëndron Kastrati, bënë edhe hapjen e këtij aktiviteti.

 I pari i komunës, Qëndron Kastrati, u shpreh mirënjohës ndaj të gjithë atyre që iu përgjigjën pozitivisht ftesës për pastrimin e lumit “Krivareka”.

 "Falënderoj të gjithë ata që janë këtu në mbështetjen e këtij aksioni vullnetar. Sot është Dita Ndërkombëtare e Biodiversitetit dhe kemi fatin që Arian Mavriqin e kemi qytetar të komunës sonë, që ka marrë iniciativën pë këtë aktivitet, të cilën padyshim ne si komunë së bashku me Ambasadën Amerikane kemi pasë kënaqësinë ta mbështesim, në mënyrë që të kontribuojmë në pastrimin e shtretërve të lumenjëve, si dhe të ngrisim vetëdijen dhe kujdesin në mbrojtje të mjedisit” tha ai.

 Sipas Kastratit, me këtë nismë kontributi për kujdesin ndaj mjedisit, u mundëson që vizioni për Kamenicën të ketë më shumë hapësirë të jetë një nga komunat më të gjelbra në Kosovë.

 "Më vjen shumë mirë që sot bashkë me ekipën e gjelbër të Ambasadës Amerikane gjendemi në Kamenicë, për t'ju mbështetur juve në përpjekjet tuaja për promovimin e komuniteteve dhe ujërave sa më të pastra në Kosovë. Falënderoj kryetarin e Kamenicës për ftesën dhe mikëpritjen e ngrohtë. Jam i inspiruar me juve vullnetarë që jeni sot këtu. Kamenica ka një reputacion që e ka merituar falë përkushtimit të vetë banorëve për ndërtimin e komunitetit të shëndosh”, tha ai.

Mes tjerash ai çmoi marrëdhëniet e shkëlqyeshme ndërmjet komunitetit në Kamenicë, si dhe KFOR-in që ishin sot të pranishëm në këtë aksion.

 “Gjithashtu e çmoj edhe marrdhënien e shkëlqyeshme ndërmjet komunitetit vendor dhe KFOR-it, faleminderit shumë KFOR që jeni sot me ne. Kjo që po bëjmë sot është shumë e rëndësishme, por nuk duhet të ndalemi vetëm me këtë aktivitet këtu, prandaj është me rëndësi që të vazhdojmë të jemi aktiv. Është shumë e veçantë që në Ditën e Biodiversitetit komunitetet e llojllojshme po bashkohen që të bëhen pjesë e këtij aktiviteti", shtoi mes tjerash Giacobbe.